Border village cheina turin Rs vbch 1,100 pe

Sorkar laipui chuan state 17-a international border-a thingtlang khaw hrang hrangte chei leh tihhmasawnna turin cheng vaibelchhe 1,100 a pe.

Home Ministry chuan ramri hrula model village 61-a health center, school leh drinking water siamna turin cheng vaibelchhe 126 chu state sorkarte hnenah pek nghal a nih thu a sawi a, a ṭul angin sum hi pek belh zel tur a ni, a ti.

Ramri bial cheiṭhatna tur, Border Area Development Programme (BADP) chungchang ngaihtuahin Ningani khan high-level meeting neih a ni a, he hunah hian state 17-a district 25-a district magistrate-te an tel a ni. BADP atan hian kum 2015-16 khan cheng vaibelchhe 990 dah a ni a, hei hi tipungin kum 2017-18 atan cheng vaibelchhe 1,100 ruahman a ni.

Ningani-a meeting neihah hian Arunachal Pradesh, Jammu and Kashmir, Tripura, Uttar Pradesh leh West Bengal sorkar aiawhte chuan thu saiwin, BADP hnuaia hmalakna leh hlawhtlinna hrang hrangte, state sorkarin ramri biala chengte hmasawnna a hmalak dan hrang hrangte an sawilang.

Meeting kaihruaitu Home Minister Rajnath Singh chuan ramri hrula chengte chu India ram tana mi ṭangkai tak an nih thu sawiin, ramri venhim chu thil pawimawh tak a ni,a ti. Ramri bula khaw hrang hrangte tihhmasawn leh an khawsak phung tichangkan tura kawng hrang hranga hmalak a ngai a ni, a ti. 

Singh chuan sorkarin ramri bula chengten inkalpawhna ṭha an neih te, tui thianghlim, school, hospital leh hmanrua pawimawh dangte an neih theihna tur chu sorkar laipui chuan a dah pawimawh hle a ni, a ti. BADP hnuaiah ramri-a infrastructure tihchangtlun leh hmasawnna hna kalpuina turin sorkar laipui chuan a thawhpui zel dawn tih a sawi bawk.