AP-ah gas put vangin mi paruk thi

Andhra Pradesh-a Anantapur district-ah steel factory aṭanga gas hlauhawm tak putchhuah vangin mi paruk an thi.

Tadipatri khaw daia Gerdau Steel India Ltd factory-ah Ningani tlai dar 5 khan gas put hi hriatchhuah ani a, he factory hi Brazil company Gerdau SA ta a ni a, Sao Paolo-ah hmunpui neiin America rama steel siamtu company lian ber zinga mi a ni. Tadparti plant hi Asia khawmuala an factory hmasa ber a ni a, kum 2007 khan Kalyani Steels Ltd nena thawk dunin SJK Steel Plant Ltd an lei a, a hnuah an thawhpuite share hi lei leh vekin factory neitu hian a nei chhunzawm ta a ni.

Sub-inspector Ramakrishna Reddy chuan gas hlauhawm tak put vangin a bula hnaia hnathawktu ṭhenkhat chu an thi tih a sawi a, gas putna chhan hi hriatchian a la ni lo tih a sawi. Mi paruk an thih bakah midang panga-te chu an dinhmun a ṭha lo hle niin a sawi. Plant pawh hi khar nghal a nih thu a sawi bawk.