Karnataka CM-in hamṭhatna dang puang leh

Karnataka Chief Minister HD Kumaraswamy chuan July 5-a state budget a pharh ṭuma loneitute loan ba ngaihdamna tur a puan hnuah, Ningani khan cooperative bank aṭanga loan ba neite ngaihdamna tur a puan bel leh.

State budget a pharh ṭum hian CM Kumaraswamy chuan loneitute loan ba aṭang cheng vaibelchhe 34,000 ngaihdamna tur scheme a lo puang tawh a, he scheme hnuaiah hian national bank-a loneitu loan ba, cheng nuai hnih chin nei chu Rs 25,000 chin ngaihdam an nih tur thu a puang a ni. Nimin khan cooperative bank aṭanga loan, cheng nuai khat chin late leiba ngaihdam ṭhen a ni leh dawn tih sawiin, hemi atana sum sen tur hi cheng vaibelchhe 10,700 a tling dawn a ni.

State sorkarin loan ba a ngaihdam ṭhen tur hi state chhunga loneitute nuai 22.23 velin an chhawr thei dawn niin official thuchhuah chuan a tarlang.

Hetihlai hian Karnataka-a ṭangrual sorkar siamtu zinga mi, Congress-in fuel man sang tihniam tura ngenna erawh chu sorkarin a hnawl a, finance portfolio changtu ni bawk CM chuan fuel man chungchanga thutlukna an lo siam tawh chu hman chhunzawm zel a ni dawn tih a sawi. Kar hmasaa budget a pharh ṭumin Kumaraswamy hian an state chhungah petrol leh diesel man chu liter khatah Rs 2.14 leh Rs 1.12-a tihsan a nih tur thu a lo sawi tawh a ni.