PM Modi-an Bansagar canal project a hawng

Prime Minister Narendra Modi chuan nimin khan Uttar Pradesh-a Mirzapur-ah Bansagar canal project a hawng.

PM Modi hian ni hnih chamin UP hi a tlawh a, medical college lungphum a phum bakah, 100 PM Jan Aushadi Kendras leh Balughat-a Ganga luia lei dawh a hawng nghal bawk.

Nimina PM-in a hawn, Bansagar Dam project hi Madhya Pradesh, Uttar Pradesh leh Bihar ten a huhoa an siam niin, canal thui zawng hi km 171 a ni. He project hnuaia canal te hian Madhya Pradesh-a Shahdol district aṭangin Adwa Barrage, Meza Dam leh Jirgo reservoir tan tui a pe thei dawn a ni.

He project hi irrigation tihchakna tura ruahman a ni a, Uttar Pradesh-a Mirzapur leh Allahabad district-a loneituten an chhawr ṭangkai hle rin a ni a, loneitu nuai khat chuangin an chhawr thei dawn nia sawi a ni.

Project hawngtu, PM Modi chuan Mirzapur-ah vantlang inkhawm nei zuiin BJP kaihhruai National Democratic Alliance (NDA) sorkar chuan loneitute dinhmun chawisang turin theihtawp a chhuah zel tih a sawi a, tunhnaiah minimum support price (MSP) pawh a punchhoh thu sawiin loneitute pawhin awlsam takin leichi te an nei thei tawh a ni, a ti.

Modi chuan sorkar hmasa chuan project zawhfel loh tam tak an nei tih sawiin, hei hi a tuartu ber chu tualchhung mipuite an ni, a ti. He project hi a hmain zawhfel lo ni tawh se chuan kum sawmhnih liamta aṭang khan mipuite chuan an chhawr tawh dawn a ni, tiin a sawi.