President-in RS member thar tur mi pali ruat

President Ram Nath Kovind-a chuan Rajya Sabha member atan mi pali a ruat thar.

Rajya Sabha member atana ruat tharte hi BJP MP hlui leh loneitu Ram Shakal, RSS hruaitu leh columist Rakesh Sinha, classical dancer Sonal Mansingh leh lungker thiam Raghunath Mohapatra te an ni. President-in RS member atana a ruatte hi Prime Minister Narendra Modi-an a rawtte an ni. Constitution-a Articel 80 (1) (a) chuan Presidnet hian Rajya Sabha member atan mi 12 a ruat a phalsak a ni.

Ram Shakal hi Uttar Pradesh-a loneitu pawl hruaitu a ni. BJP ticket-in Lok Sabha-ah ṭum li thlan tlin a ni tawh. Rakesh Sinha hi RSS hruaitu niin India Policy Foundation dintu a ni. Delhi University-ah Associate Professor niin, RSS founder KB Hedgwar-a biography pawh a ziak tawh a ni. Chanchinbu hrang hrangah thu a ziak fo a, TV debate ah pawh hriat hlawh tak a ni. Tunah hian Indian Council of Social Science Research member nilai a ni. Raghunath Mohapatra hi khawvel huap pawha lung chher thiama hriat lar a ni a, mi 2000 chuang zet a zirtir chhuak tawh a ni. 

A hnathawh langsar tak zingah Parliament Central Hall-a feet ruk-a sang sung god lim te, Vir Bhoomi-a lotus lem a ker te, Paris-a Wooden Buddha te a tel. Member ruat thar zinga hmeichhe awmchhun, Sonal Mansingh hi classical dancer a ni a, New Delhi-a Centre for Indian Classical Dances dintu a ni. Padma awardee a ni a, hmeichhe lamthiam zingah hetiang chawimawina sang dawng thei pahnihna a ni. A chanchin behchhana siam, 'Sonal' documentary chu kum 2002 khan National Award for non-feature film dawng tura thlan a lo ni tawh a ni.