Congress-in thupha chawi turin PM an phut

Congress Party chuan Prime Minister Narendra Modi chu Congress party chu Muslim mipa te tan chauha dinga a sawi chungchangah thupha chawi turin an phut.

PM Modi hian kar kalta Inrinni-a Azamgarh-a thu a sawinaah, triple talaq chungchangah Congress party chu na taka sawiselin, Muslim mipate tan chauha ding ang maiah a puh a ni.

Modi-a thusawi duh dan hi Congress chuan na taka sawisel nghalin, a thusawi duhdan aṭangin a ngaihtuahna ṭha lo tak a tilang a ni, an ti. PM chuan a ngaihtuahna ṭha lo leh rilru herh tak a neihzia a tilang a ni tiin, Modi chu PM office zahawmna tichhe zelah an puh bawk. An party a puhna chungchang chu July 18-a Parliament Monsoon Session neih hunah sawiho an phut nghal bawk.

Congress thupuangtu Anand Sharma chuan, "PM hian khawtlang mipuite ṭhendarh a tum a ni. Eptu party lian ber, India zalenna sualna kawnga a hma hruaitu INC Muslim party tia a ko hi PM tih tur a ni lo. A thusawi avang hian thupha a chawi ngei tur a ni", a ti. Congress chuan PM hnenah India history chungchangah thu dik lo sawichhuak fo tawh lo turin a ngen nghal bawk tih a sawi.

Sharma chuan Modi chu India ram pum prime minister a ni a, BJP prime minister chauh a ni lo tih sawiin, India ram history a hrechiang tawk lo a ni, a ti. Congress chuan triple talaq chu a duh lo a, mahse heti chung hian an party chuan parliamentary system dante chu a zawm zel dawn tih a sawi.