Rahul Gandhi-an PM hnenah Women's Bill a thlawp tur hrilh

Congress president Rahul Gandhi chuan nimin khan a twitter-ah Parliament-a Women's Bill pass a nih theih Prime Minister Narendra Modi chu an thlawp dawn tih a hrilh. He bill hi kum riat zet Lok Sabha-ah pass theih lohin a awm tawh a ni.

Rahul Gandhi chuan, " PM Modi chuan party politics ringawt buaipui lo a, a thusawi hlenchhuak tura a beih a, Parliament-a Women's Reservation Bill pass a nih ngei theihna tura a beih a hun tawh a ni. Congress chuan he thilah hian PM hi kan thlawp dawn a ni", tiin a ziak.

Women's Reservation Bill hi Parliamaent leh Legislature-a seat awm zat hmun thuma ṭhena hmun khat hmeichhiate tana dahna tur a ni. Kum 2010 khan Rajya Sabha-ah pass a ni tawh a, mahse tun thlengin Lok Sabha-ah a la tlang thei lo a ni.

PM Modi tana lehkha a ziahah, Rahul Gandhi chuan, vantlang inkhawm neih hrang hrangah PM chuan hmeichhiate thuam chak a duh zia leh, khawtlang nunah pawh chanvo pawimawh leh awmze nei zawk neihtir a duh thu a sawi fo tih a tarlang. Heng a thusawite tihpuitlin a nih theihna tur hian Women's Reservation Bill a tlangna tura lo thlawp aia ṭha dang hi a awm lo a, a hun ṭha ber pawh Parliament session lo awm tur hi a ni ang tiin a sawi.

Congress president chuan he bill thlawpna lantirtu mi maktaduai 3.2 chuang signature pawh an party chuan a lakhawm tawh tih a sawi bawk.

Hetihlai hian party hrang hrang chhungah hmeichhiate quoata siamsakna tur bill hi duh lo an tam a, RJD leh Samajwadi Party chuan he bill hi an dodal thu an sawi tawh a ni.