BJP MLA-in sakhaw danga inlet tribal-te sorkar facility pek loh rawt

Madhya Pradesh-a BJP MLA Dinesh Kashyap chuan tribal, sakhaw danga inlette chu sorkar facility pek an ni tur a ni lo, a ti. Hemi rual hian a thusawi chu a mimal ngaihdan a nih thu a sawi nghal bawk.

News agency ANI in a kawmnaah, Kashyap chuan an sakhua kalsan a, sakhaw danga inlette chu sorkar aṭangin eng hamṭhatna mah pek an ni tur a ni lo, a ti. Hei hi kalpui a nih chuan sakhaw danga inlet awm fo ṭhin pawh an tlem phah ngei dawn niin a sawi.

Tun hnaiah Jharkhand state-a Dumka district-a tribal khuaah midangte sakhaw danga inleh tir tuma puh mi 16 chu Freedom of Religion Act hnuaiah man an lo ni tawh a ni. Police-te chuan an mi mante hi Kristian pawl nena inzawm niin an sawi a, an kut aṭang hian poster leh sakhaw lehkhabu te an man tel tih an sawi.