TDP-in Parliament-ah sorkar rin tawk lohna putluh tum

Andhra Pradesh-a rorellai, Telegu Desam Party (TDP) chuan vawiin aṭanga ṭan tur, Parliament Monsoon Session neih chhungin centre-a BJP kaihhruai National Democratic Alliance (NDA) sorkar rin tawk lohna motion put luh a tum.

TDP hotu leh Andhra Pradesh Chief Minister N Chandrababu Naidu chuan sorkar laipuiin an state tana special status pek a lo tiam tawh a tihpuitlin duh loh vangin NDA sorkar rintawk lohna hi an pulut dawn tih a sawi a, eptu party hrang hrangte chu an hmalak tumna thlawp turin ziakin a ngen bawk.

Naidu chuan March thlaa TDP-in NDA sorkar rin tawk lohna motion a putluh chu ngaihtuah a ni lo tih a sawi. NDA sorkar rin tawk lohna hi YSR Congress leh TDP hian Parliament Budget Session lai khan a hran ve vein an pulut a, mahse House-ah hian member-ten nawrh huaihawta rorel thei loa inkhawm an tihbuai fo avangin ngaihtuah theih a ni lo a ni.

BJP-in Andhra Pradesh tana special status pek tiam tawh a tihhlawhtlin loh vangin TDP hi NDA a thawhpuina aṭangin a inhnukdawk tawh a, eptu lamah a awm tawh a ni.

Parliament-a sorkar rin tawk lohna motion putluh an tum chungchangah eptu party dangte thlawpna an neih theih nan TDP MP-te chuan party dang hruaitute hian meeting pawh an lo neihpui tawh a ni. Nimin khan Telangana Rashtra Samitikhan hruaite pawh an hmu.

Kum 2014-a Andhra Pradesh aṭanga Telangana state hran siam anih dawn khan, khatih laia prime minister Manmohan Singh chuan kum nga chhung atan Andhra Pradesh tana special caterogy status pek chu pek chhunzawm a tiam a ni. Mahse hemi kuma inthlanpui neihah BJP chu chakin centre-ah sorkarna a siam zui a, BJP kaihhruai NDA sorkar chuan sorkar hmaa AP tana a lo tiam tawh hi a zawm duh ta lo a ni.