Nitish Kumar-an Bihar tana special status pek phut thar leh

Bihar Chief Minister Nitish Kumar-a chuan an state tana special category status pek phutna chu Thawhṭanni khan a thar thawh leh.

JD(U) national president, Nitish Kumar chuan hun rei tak Bihar tana special status pek hi a lo phut tawh a, kum 2012 October leh 2013 March te khan Patna leh Delhi-ah a thil phut nawrna atan hian rally pawh a lo huaihawt tawh a ni. Centre-a Prime Minister Narendra Modi-a kaihhruai sorkar chuan duhsakin, kawng hrang hrangin a pui nasa hle tih an hre tho chungin, special caterogy status pek hi an la phut zel dawn tih a sawi.

CM hian kartina mipuite nena indawrna hun, Lok Samvad programme a neih hnua reporter-te a kawmnaah he thu hi sawiin, Bihar-ah chuan investor-te chu chhiah pek tur lamah ngaihnathiamna pek an nih loh chuan investor-ten investment tihna atan an thlang ṭha duh lo tih a sawi a, hei vang hian special status pek an ngai tih a sawi.

Special status pek an ngaihna chhan a sawi zingah, Nitish Kumar chuan Bihar aṭanga Jharkhand state siam a nih hnuah an state leilung hausakna tam tak an chan a, hei bakah hian Bihar hmarlam bial chu kumtinin tuilianin nasa takin a suasam ziah a ni, a ti.

14th Finance Commission chuan special caterogy status pek theihna tur hi a lo tibo tawh a, mahse hetichung hian Bihar leh Andhra Pradesh chuan he status pek hi an la phut zui reng a ni.