Dan loa insawisakna thleng ṭhin venna dan ngaihtuah turin ti

Supreme Court chuan ramchhunga bawng humhalh chhuanlama hmanga mipui thinrimin mi an sawisak leh an tihhlum fo chungchang chu nimin khan ngaihtuahin, Parliament hnenah heng thil thleng ṭhin venna tur dan ngaihtuah turin a ti.

Court chuan mi tumah dan chunga leng an awm lo a, an duh dana dan lekkawh thei an ni lo tiin, state sorkar te chuan hetianga pawikhawihna leh tharum thawhna thleng ṭhin hi an ngaizam mai tur a ni lo, a ti. Bawng humhalh chhuanlam hmanga insawisakna thleng ṭhin venna tur hian dan siam thar a ngai tih a sawi.

Chief Justice Dipak Misra, Justice AM Khanwilkar leh Justice DY Chandrachud awmna bench chuan central leh state sorkar-te chu pawl kalfawr ṭhenkhatin tharum thawhna an thlente dang leh veng tura an mawhphurhna hre thar leh turin a ti bawk.

Nikum September 6 khan Supreme Court chuan state sorkar zawng zawng hnenah bawng humhalh chhuanlama hmanga pawikhawihna thleng ṭhin veng tura hma la turin a lo ti tawh a, kar khat chhungin district tinah nodal officer atana senior police officer ruat tur te, bawng humhaltu pawlte endik turte in a lo ti tawh a ni.