Mother Teresa-i Missionaries of Charity enfiah dawn

Mother Teresa-i pawl, Missionaries of Charity-in fahran enkawlna in a dinte chu enfiah vek an ni dawn.

Tun thla tir lam khan Jharkhand Police-te chuan Missionaries of Charity-a nun leh thawktu pakhat chu Ranchi-ah nausen hralha puh an nih chungchangah an man a, heng mi pahnihte hian Jharkhand leh Uttar Pradesh-ah nausen pali an hralh nia puh an ni. He thil thleng vang hian Missionaries of Charity-in fahrah enkawlna in a siamte chu endik vek turin sorkar chuan a ti a ni.

Jharkand child protection body chairman chuan nausen hralh nia sawi a nih vang hian an state chhunga fahrah enkawlna in zawng zawng enfiahtu tur team din nghal a nih thu a sawi a, August thla tir lamah report kimchang thehluh theih beisei a ni, a ti. Dan loa shelter home lo din hriatchhuahte chungah chuan action na tak a lak a ni dawn tih a sawi bawk.

Women and Child Development Minister Maneka Gandhi chuan state sorkarte hnenah an state chhunga fahrah leh naupang enkawlna inte chu adoption body, Central Adoption Resource Authority (CARA).-ah thla khat chhunga inziahluh tir vek turin a ti bawk.

Ministry chuan kum hnih chuang liamtaa Juvenile Justice Act hman a nih aṭang khan, naupang enkawlna leh adoption chungchang buaipuitu leh an thawhpui pawlte chu CARA-ah an inziahluh ngei a ngai tih a sawi. Nikum December thla aṭang khan CARA-a inziaklut child care institution hi 2,300 a awm tawh a, 4,000 te dilna chu tihkhawtlai mek a la ni.