India-Russia summit : Thawhdunna tur inremna 28 an ziak

Prime minister Narendra Modi leh Russia president Vladimir Putin-te chuan Thawhṭanni khan Delhi-a India-Russia Annual Summit vawi 21-na an nei a, ram pahnihten inlaichinna leh khawvel huap thil pawimawh hrang hrangte an sawi dun.

Russia President hi summit hmang turin lehlangin India a rawn kal a, summit zawha zanriah an kil zawh hnuah a kir leh nghal a ni. India ramah hian darkar nga vel a awm.

Putin lo zin hma hian Russia foreign minister leh defence minister-te chu 2+2 ministerial meeting hmang turin an lo thleng thung.

Modi leh Putin-te meeting-ah hian ram pahnihten sector hrang hranga an thawhdunna turin remna 28 ziah a ni. Heng zingah hian space exploration, science and technology, heavy engineering, trade and investment lama thawhdunna turte pawh a tel.

Thawhṭanni veka defence minister Rajnath Singh leh Russia defence minister Sergey Shoigu-te meeting neihah, hun rei tak an lo nghah tawh, ‘A-203 assault rifles deal’ chu ziahfel a ni bawk. He inremna an siam hmang hian ram pahnih thawkdun hian Uttar Pradesh-a Amethi district-a AK-203 assault rifle nuai nga chuang, cheng vaibelchhe 5,100 sengin an siam dun dawn a ni. Defence minister-te hian ram pahnih sipaite thawhdunna tur inremna pawh kum 10 dang atan an siam thar leh bawk.