Right-wing activist-te'n zirlaite Kristiana inlehtira puhin Madhya Pradesh-a Kristian Missionary school an bei

Madhya Pradesh-ah right-wing group, Bajrang Dal worker leh tualchhung mi ṭhahnem takin Thawhṭanni khan Kristian missionary school, St Joseph School chu zirlaite Kristian sakhuaa inleh luih tira puhin an bei.

School an beih hi Vidisha district-a Ganj Basoda khuaa mi a ni a, pawikhawihna hi Class 12 zirlaiten mathematics subject exam an neih laiin a thleng a ni. Pawn lamah Bajrang Dal worker-te hi pungkhawmin school enkawltute chunga an lungawi lohna thute aupuiin school building hi an bei zui a, zirlai leh zirtirtute erawh an tlanchhuak thei hram a ni.

School beih tum a nih chungchang hi local media lam aṭangin a hma niin a hriat thu school manager, Brother Antony chuan a sawi. Police-te leh sorkar hotute pawh a hriattir nghal a, mahse hetichung hian venhimna lampang engmah an ruahman sak lo tih a sawi bawk.

Zirlaite Kristian sakhuaa inleh luih tir nia puhna chu phain, Brother Antony chuan complaint thehluhnaa an hming tarlante chu an zirlai zingah an awm loh thu a sawi.

Bajrang Dal unit hruaitu, Nilesh Agarwal chuan sakhaw inleh luihtir nia sawi chungchang hi chhui chian an phut thu leh, he thilah hian he school hian inhnamhnawih a nih chuan nawr chhiat sak vek a ni ang, tiin a sawi a ni.

Police-te chuan school beitute chungah hian hremna lekkawh a ni dawn tih sawiin, missionary school dangte pawh venhimna an ruahmansak nghal bawk. Sakhaw danga inlehtira inpuhna chungchang hi chhui ṭan niin, school enkawltute pawh zawhna zawh an ni ang tiin Sub-Divisional magistrate Roshan Rai chuan a sawi.