India ramah Covid-19 kai enkawl dam 59.06% awm tawh

Hripui lengin ziaawm lam pan thei lo mah se enkawl dam pawh an tam tawh hle a, nimin thleng khan Covid-19 kai enkawl dam 59.06% an awm tawh. 

Hri len ṭan tirh aṭanga nimin thleng khan hri kai 3,34,822 chu enkawl dam an ni tawh a, hri kai hmuh chhuah belh awm reng mah se enkawl dam hi nuai chuang fein an tam tawh zawk a ni. Ministry of Health and Family Welfare report-in nimina report a tihchhuahah chuan hri kai hmuh chhuah thar 18,522 an awm leh a, nimin piah lam aiin hmuh chhuah thar an tlem hret. 

Heti hian ram pumah hri kai mi 5,66,840 an awm tawh a, chung zinga 3,34,822 chu enkawl dam tawhin 2,15,125-in an la kai mek a, mi 16,893-in an thihpui tawh. Darkar 24 chhungin hri kai 13,099 chu enkawl dam an ni a, 418-in an thihpui leh bawk a ni. Indian Council of Medical Research (ICMR) chuan ni khatah sample 1,10,292 an test tih nimina report an tihchhuahah tarlangin hri leng ṭantirh aṭang khan Covid-19 sample 86,80,654 an test tawh tih an tarlang. Sorkar laboratory 761 leh private laboratory 288-ah heng sample endik hna hi an thawk mek a, sample endikna kawngah pawh hian hma an sawn ve zel bawk.

Maharashtra-ah hri kai hmuh chhuah thar 5,257 an la awm a, hri kai 1,69,883 awm tawhin heng zinga 88,960 chu enkawl dam tawh an ni a, mi 7,610 chuan an thihpui tawh a ni. 

Tamil Nadu chu hun eng emaw chen hri kai tam ber dawttu state/UT a nih hnuah Delhi aiin ni eng emaw zat hri kai an tlem zawk a, mahse nimina MoHFW report tihchhuahah chuan Delhi aiin Tamil Nadu-ah hian hri kai hi an tam leh tawh zawk. 

Tamil-ah hian hri kai hmuh chhuah thar 3,949 an awm leh a, nimin thleng khan hri kai 86,224 an awm tawh a ni. Delhi-ah erawh hri kai 2,084 chu hmuh chhuah thar leh niin mi 85,161-in an kai tawh thung. Enkawl dam tawh lamah pawh Delhi hi an sang zawk a, mi 56,235 an enkawl dam tawh laiin Tamil-ah chuan 47,749 an enkawl dam tawh a ni. 

Hetihlai hian Delhi-ah hian thi an tam zawk a,  2,680-in an thihpui tawh laiin Tamil Nadu-ah chuan 1,141-in an thihpui a ni.