PM Modi-an ram mipuite tana thuchah sawi

Prime minister Narendra Modi chuan nimin khan ram mipuite tana thuchah sawiin, hei hi India rama coronavirus a len hnuah thuchah a sawi ṭum 6-na a ni. 

Narendra Modi chuan  PM Garib Kalyan Ann Yojana scheme chu kumin November thla pawhsei a ni dawn tih sawiin, chhungkaw tinte tan chana kg 1 thla tin pek an ni dawn a, mi vaibelchhe 80 chuangin thla tin wheat/buhfai kg 5 an dawng dawn bawk a, hemi atana sorkarin sum a seno tur hi cheng vaibelchhe 90,000 a tling dawn tih a sawi. Prime minister chuan hri leng chungchanga India chuan a hun takah lockdown leh khuahkhirhna te a kalpui avangin a dinhmun pawh a ṭhat phah niin a sawi.

 

Mipuite chu kut sil, sanitizer hman, mask vuah leh social distancing dante zawm ṭha turin a chah nawn leh a, fur ruahtui tlak hun a nih chhoh avangin natna hri kai pawh a awl lehzual a, hei vang hian fimkhur zual turin a chah. 

Modi chuan ram pumah ration card in ang hmanna tur, One Nation One Ration siam tum a ni a, hei hi a bikin kuthnathawk, hmun danga inhlawhfa tura chhuah ngaiten an chhawr ṭangkai dawn a ni, a ti.