China-in an apps khap a ngaimawh
Sorkar laipuiin Chinese smartphone application 59 a khap chu China chuan a ngaimawh hle a, thil awmdan a zirchian tur thu a sawi.
Chinese mobile apps khap zingah hian tunlaia hman lar tak tak TikTok, Shareit leh Cam Scan te pawh an tel. Sorkar laipui chuan Thawhṭanni zan khan thuchhuah siamin, heng application 59-te hi India himna tiderthawng thei nia ngaih a nih avangin titawp lailawk a nih thu a puang a ni. Hemi rual hian heng application tihtawp a nihna chhan hi Line of Actual Control-ah India leh China inkar boruak ṭha lo nghawng a nih rin a ni thung.
Sorkarin a tihtawp Chinese app 59-te hian an sum lakluh aṭanga 30-40% vel hi India aṭanga an lakluh nia chhut a ni. Tunlaia app lar tak,Tiktok hian September thla thlengin India aṭang hian cheng vaibelchhe 100 lakluh hman a tum a, mahse tihtawp zingah a tel ve ta a ni. India ramah Tiktok hmangtu hi maktaduai 120 chuang an awm a, a siamtu hi Chinese company ByteDance a ni. China company Alibaba siam, UC Browser hi India ramah Google Chrome dawta internet browser hman nasat ber a ni bawk.
China mobile phone apps tam zawk hian apps dangte aiin a hmangtute hnen aṭanga information a dil hi 45% in a tam zawk a, heng zingah hian Tiktok, UC Browser, Helo leh Shareit te pawh an tel. Hetih lai hian China chuan company zawng zawngte hnenan an date chu sorkarin a en phalsak vek turin a ti a, hei vang hian an mobile apps hmangtute private data chu company hian sorkar hnenah a pe vek thei a ni. Mobile app market lamah China hian ṭan lain a lar chak hle. Kum 2017 khan top 100 apps zingah Chinese apps hi 18 chauh a la awm a, mahse kum 2018-ah chuan top 100-ah hian 44 an awm hman tawh.