Ram danpui kalh tia CAA puang tura ngenna SC-in ngaihtuah nghal duh lo
Supreme Court chuan sawisel hlawh tak leh rampuma buaipui mek, Citizenship (Amendment) Act (CAA) chu ram danpui kalh a ni tih puang tur leh, state hrang hrang hnena he dan hmang tura hriattirna dang tura ngenna lutte chu a ngaihtuah nghal duh lo.
Chief Justice of India SA Bobde kaihhruai bench chuan, he petition lut hi mak an tih thu leh, Act hi ram danpui kalh a ni tia puang tura ngenna thehlut vawi khat an hriatna a ni tih a sawi. Bench-ah hian CJI bakah justice BR Gavai leh Syra Kant te an awm tel a ni.
Bench chuan, court hna chu dan siam chu a rintlak tawk em tih lo entu a ni a, ram danpui kalh a ni tih lo puan lam a ni lo, a ti. Hemi rual hian CAA chungchanga petition hrang hrang lutte chu tharum thawhna thlengte a reh hunah a ngaihtuah chauh ang tih a sawi bawk.
Sorkar dan siam thar, CAA hi ram danpui kalh a ni tih puang tura ngenna thehluttu hi advocate Vineet Dhanda a ni. A ngenna thehluhah hian thu dik tawk lo thehdarhtu, activist, zirlai leh media house-te chunga action la turin a ngen tel bawk a ni.