Helicopter che sualah India sipai lal ber Gen Rawat a thi

Tamil Nadu-a Coonoor bul, Nilgiris-ah nimin khan Indian Air Force (IAF) chopper, Russia siam Mi-17V5 helicopter a tla a, Chief of Defence Staff General Bipin Rawat, a nupui Madhulika Rawat leh Armed Force mi leh sa 11 an thi.

Helicopter-ah hian CDS General Rawat, a nupui leh a staff-te bakah crew member panga, an vaiin mi 14 an chuang a, an zinga mi 13 te hi an thi a ni. Group captain Varun Singh chuan hliam na tak a tuar a, Wellington-a Military Hospital-ah enkawl a ni.

IAF chopper hi Sulur, Coimbatore-a army base aṭangin Wellington, Nilgiria hill pana a thlawh chhuah hnu lawkah Nilgiris-ah chhun dar 12:20 vel khan a tla a ni. Mi-17V5 pilot hi wing commander Prithvi Singh Chauhan a ni.

Indian Air Force chuan thlawhtheihna chetsual thu hi sawiin, a chetsual chhan chhui turin thupek pawh tihchhuah nghal a nih thu a sawi.

Indian Army chief hlui, kum 63 mi General Rawat hi kum 2019 khan Chief of Defence Staff hmasa ber atan hian dah a ni a, sorkar laipuiin department a siam thar Department of Military Affairs hotu-ah ruat a ni bawk.

Tamil Nadu-a IAF chopper chetsualna thleng vang hian nizan dar 6:30 khan prime minister Narendra Modi kaihhruaiin Cabinet Committee on Security (CCS) meeting neih nghal a ni. He meeting-ah hian defence minister Rajnath Singh leh home minister Amit Shah pawh an tel.