Mipui inthlauhna nasatna zingah India tel 1%-in sum lakluh aṭanga 22% ang zel nei

"World Inequality Report 2022" tih­chhuahah, India ram chu khawvel ram zinga mipui intluktlan lohna nasa leh rethei tamna ber zingah a tel. Kum 2021 chhunga ramin sum a lakluh hmun ngaa ṭhena khat chu ram mipui 1% velin an chang.

He report hi World Inequality Lab co-director Lucas Chancel, French economist Thomas Piketty leh mithiam ṭhenkhatten an siam a ni.

Report chuan India chu khawvela ram mipui inthlauhna nasatna ber zingah a tel tih a tarlang. India rama puitling pakhatin kum khata an sum lakluh chu chawhrualin Rs 2,04,200 a ni. A hnuai lam, 50% te chuan Rs 53,610 zel ang an lakluh laiin a sang zual 10%-te chuan a let 20 zetin an lalut tam thung a, Rs 11,66,520 an lalut pha.

"Ramin sum a lakluh pumpui aṭang hian top 10% leh 1% te chuan 57% leh 22% zel ang an nei a, hetih lai hian a hnuai lam 50% te chan chu 13% chauh a ni thung," tiin report chuan a tarlang. India ram chu ram rethei, mipui inthlauhna nasa tak leh mi hausa tamna a ni bawk a ni, a ti.

Report tarlan danin, India rama chhungkaw khat thil neih hlutzawng chawhrual chu Rs 9,83,010 a ni bawk.

Sum leh pai lamah inthlauhna a nasat ang bawkin, mipa leh hmeichhiate dinhmun inthlauhna pawh a nasa hle tih report chuan a tarlang bawk a ni. "Hmeichhiate'n an hnathawhna aṭanga an sum lakluh, labor income share chawhrual hi 18% a ni. Asia ram (21%, China tiam lohin) nena khaikhin chuan a la hniam hle a ni" tiin hei hi khawvel ram zinga a hniam ber pawl niin, Middle East lama average share 15% ai chauhin a sang zawk tih report chuan a sawi.