Loneituten nawrh chhunzawm zel tum

Loneitute chuan sorkar laipuiin farm law pathum chu sut tawh mah se, an thil phut dangte tihhlawhtlin vek a nih hma chuan nawrh chhunzawm zel an tum tih an sawi.

Loneitu pawl hrang hrang intelkhawm, Samyukta Kisan Morcha (SKM)-in sorkar laipui dawr tura member panga awmna committee a din chuan nimin khan meeting an neih hnuah he thutlukna hi an siam a ni. Committee chuan MSP siamsak leh nawrh huaihawt chhunga loneitu thubuai siamsakte sut leh vek turin an ngen bakah, loneitute kaihhnawih thil dang hrang hrangah sorkar laipui chu inbiakna an neihpui chhunzawm zel dawn tih an sawi bawk.

SKM member-te hian an thil phut dang chungchangah union minister Amit Shah leh Narendra Singh Tomar-te pawh hmuh leh an tum.

Ram chhunga loneitu pawl hrang hrang 40 intelkhawmna, SKM member-te chuan an thil phut chungchanga sorkarin ensak a tiam dan chu sawichiang turin an phut. Sorkar hian farm law pathum sut a nih hnuah loneitute hi an nawrh tihtawp tawh turin a ngen a, an thil phut dangte pawh enzui a tiam bawk. Mahse loneitute hian an thil phutte hi tihhlawhtlin vek a nih hma chuan nawrh chu tihtawp mai an tum lo tih an sawi a ni.