Rajya Sabha-a eptu MP 120-ten lungawi lohna lantir

Rajya Sabha-a eptu MP 120-te chuan nimin khan eptu MP 12-te suspend an nih avanga lungawi loin,Parliament Complex-ah sit-in protest an huaihawt.

Rajya Sabha-a eptu party MP 12-te chu session neih zawh takah an chet dan mawi loh avangin tuna neih mek, Parliament Winter Session neih chhung chu tel thei lo turin hrem an ni.

MP-te hrem an nih avang hian Rajya Sabha rorel inkhawm pawh a mumal thei lo a, eptu member-te chuan rorel inkhawm hi an tibuai fo a, MP-te hremna hi sut a nih hma chuan lungawi lohna lantir chhunzawm zel an tumthu an sawi. Hetih lai hian sorkar lam chuan MP hremte hian House chhunga an chet dan mawi loh avangin ngaihdam an dil hmasak phawt a phut thung.

Congress hruaitu, Rajya Sabha-a leader of oppositon Mallikarjun Kharge chuan Rajya Sabha-a rorel a bahlah chhanah sorkar chu mawhphurtu a ni tiin, MP 12-te hrem a nih dan chu dik lo leh democracy kalphung lo a nih thu a sawi. Sorkar chuan member tinte hi hrem an nihna chhan chiang takin a sawi vek tur a ni a, hrem an ṭul a nih pawhin August 11 khan a lo hrem tawh tur zawk a ni, a ti. Session liam taa an chet dan vangin session neih mekah member-te hrem turin sorkar chuan dikna a neih loh thu a sawi bawk.