LS-ah sorkar rin tawk lohna motion ngaihtuah dawn

Kum 15 chhunga a ṭum khatna turin Lok Sabha-ah sorkar laipui rin tawk lohna motion putluh chu pawm a ni a, naktuk Zirtawpni hian ngaihtuah a ni ang.

Nimin khan Parliament Monsoon Session ṭan a ni a, session ṭanni-ah Lok Sabha Speaker Sumitra Mahajan-i chuan eptu pawl, Congress, Telugu Desam Party leh National Congress Party-in sorkar rin tawk lohna motion an putluh chu Zirtawpniah ngaihtuah turin a pawmsak a ni. Parliamentary Affairs Minister Anant Kumar chuan, eptuten Prime Minister Narendra Modi-a kaihhruai sorkar chu an ring zo tawh lo tiin sawi mah se, ram mipuite an la ringtawk hle tih hria se a duh thu a sawi.

Nimina Lok Sabha inkhawma no-confidence motion putluh hi eptu MP 50 chuangin an thlawp a ni. Danah chuan Speaker hian motion pawm a nih avanga ni 10 chhung ngeiin he motion ngaihtuah a nih hun tur hi a puan a ngai bawk.

Lok Sabha-a no-confidence motion ngaihtuah tur hian centre-a BJP kaihhruai NDA sorkar dinhmun a tiderthawng pha dawn chuang lo a ni. BJP hian a thawhpui party te tel lo pawhin Lok Sabha-a hian seat 273 zet a nei mek a, majority a nei pha a ni. Mahse BJP kaihhruai sorkar paihthlakna tur tling zo lo mah se eptute tan chuan sorkar rin tawk lohna motion putluh hi an ngaihdan tarlanna hun remchangah an duh a ni. Kum 2003 pawh khan Sonia Gandhi chuan hetih laia prime minister Atal Behari Vajpayee-a kaihruai NDA sorkar rin tawk lohna motion a lo pulut tawh a ni. Hemi ṭum pawh hian eptu lam chuan sorkar paihthlakna tur member an ngah tawk lo a, mahse an thil duh leh phut puanzarna hun atan an hmang duh a ni.

Nimina Parliament session ṭanni-ah hian Telugu Desam Party(TDP) member-te chu Andhra Pradesh tana special status caterogy pek phutin an aubuai nghal. Session ṭan hma hian AP-a eptu pawl, YSR Congress member-te pawhin parliament pawnah special status phut hian nawrh an huaihawt bawk.

Kumin kumtir lama Parliment Budget session-ah khan TDP chuan no-confidence motion hi a lo pu lut tawh bawk a,mahse AIADMK leh Telangana Rashtra Samithi member-ten rorel thei loa house-a an auhbuai reng avangin ngaihtuah theih a ni lo a ni. He budget session hi kum 18 chhunga ro an rel theih tlem ber ṭum niin, rorel hun tura ruat aṭanga 21% chhung chauh mumal takin hna an thawk a ni.