Kum tling lo pawngsual rawntute mipuiin khawih

Tamil Nadu-a hmeichhe naupang kum 11 mi pawngsual rawntua puh, mi 18-te chu Thawhlehni khan Chennai court-a hruai an nih laiin mi ṭhenkhat thinrimin kut an thlak a, kutthlaktu zingah hian lawyer-te pawh an tel nia sawi a ni.

Chennai High Court-a advocate-te chuan kum tling lo hmeichhe naupang chunga rawng taka chetute thiltih hi an dem thu sawiin, court-ah pawh an dinsak duh lo a ni. Pawngsual tawktu hmeichhe naupang hi ri hriatna lam ṭha lo nia sawi a ni bawk.

Police-te chuan he hmeichhe naupang hi thla sarih kalta aṭang khan ṭum eng emaw zat pawngsual rawn a ni tih an sawi a, pawikhawihtu zingah hian an chenna apartment-a security men, lift operator, plumber leh water supplier te an tel a ni. Heng mite hian hmeichhe naupang hi damdawi-a hrai ruiin in ruakah an pawngsual rawn ṭhin a, midang a hrilh chuan kutthlakah leh an khawih lai video tihchhuahah an vau bawk. Hmeichhe naupang hian hun eng emaw chen midang a hrilh ngam loh hnuah Delhi aṭanga a u rawn zin chu a hrilh a, Pathianni khan a chhungte chuan police-ah complaint an thehlut ta a ni.

Pawngsualtua puhte hi man niin, Thawhlehni khan Mahila Court-ah hruai an ni. Court-ah hian mipui thinrim pungkhawmin an lo khawih zui ta nia sawi a ni. Chennai High Court Advocate Association president G. Mohana Krishnan chuan kutthlaktu zingah hian lawyer an tel lo niin a sawi thung a, mahse pawngsualtute tana dinsak an tum lo tih a sawi. Tamil Nadu state chhung hmun dang leh Pondicherry-a advocate assosiation-te hnenah pawh pawngsualtute tana dinsak lo tura an ngen thu a sawi bawk.