Ramdang palai 15-te'n J&K an tlawh

Ramdang palai 15-te chu ni hnih cham turin nimin khan Jammu and Kashmir-ah an zin a, an cham chhung hian civil society member hrang hrangte an kawm ang. 

J&K tlawhtute hi US, Viet­nam, South Korea, Uzbekistan, Nigeria, Morocco, Guyana, Argentina, Philippines, Maldives, Bangladesh leh Peru palaite an ni. European Union palaite erawh an tel ve lo. EU palaite chuan a hrana tlawh an tum nia sawi a ni a, pawnchhuak thei loa hren  mek chief minister hlui pathum - Farooq Abdullah, Omar Abdullah leh Mehbooba Mufti-te pawh hmuh an tum nia sawi a ni. 

Nikum August 5 khan sorkar laipui chuan Jammu and Kashmir special status pekna, Article 370 a titawp a, state a nihna ṭhiatin union territory pahnihah a ṭhen zui bawk. Article 370 tihtawp a nih hnuah political leader tam tak chu man niin, internet service pawh tihtawp a ni a, sipaite venhimna khauh tak hnuaiah dah a ni. He thil thleng hi Pakistan chuan na taka sawiselin ramdang lakah pawh a zualko nasa hle. Mahse sorkar laipui chuan boruak hian 

ṭhat lam a pan zel tih sawiin, Pakistan-in a puhna chu a dik lo tih leh, security dinhmun dik tak an hriatfiah a, hrilhfiah an nih theihna turin ramdang palaite hi tlawh turin a sawm a ni. 

Ramdang palaite hian J&K-a an cham chhung hian civil society member hrang hrangte an kawm dawn a, Army leh intelligence service-te'n security dinhmunte an hrilhfiah dawn bawk a ni. Sorkar laipui chuan palaite hian tualchhung mipuite pawh an duh ang chu an kawm thei tih a sawi a, mahse an zinga tumah hian political leader, hren mekte kawm tel an duh thu an sawi lang lo tih a sawi. Palaite hian Lt Governor GC Murmu leh official dangte pawh an kawm bawk ang. 

Article 370 tihtawp a nih hnuah, nikum October thla khan EU MP 23-te chuan ni hnih chamin J&K hi an lo tlawh tawh bawk. Sorkar chuan EU MP-te hi sorkar ruahmanna siamsaka zin ni loin, an mahni duhthu anga kal zawk an ni tih a sawi.