Rajnath Singh thusawi vangin eptute House aṭangin chhuak

Union Home Minister Rajnath Singh-a thusawi avangin nimina Lok Sabha rorel inkhawmna aṭangin eptu member-te an chhuak tau.

Parliament Monsoon Session neih mekah nimin khan Lok Sabha leh Rajya Sabha-ah ramchhunga mipui thinrimin bawng humhalh chhuanlama mi an sawisak hlum ṭhin chungchang sawichhuah a ni. Lok Sabha-ah chuan sawihonaah, hetianga mipuiin an sawisakna thleng ṭhin hi state subject a ni a, a veng turin state sorkar ten hma an lak a ngai a ni, a ti.

Rajnath Singh chuan kut inthlak leh insawisak rawn thleng ṭhin chu a dem thu a sawi rualin, hengte hi thu dik lo thehdarh avanga thleng fo a ni tih a sawi. Mahse heng thil thleng veng tur leh, hma la tu tur chu state sorkar a ni tih a sawi. Insawisak rawn thleng ṭhin chu tunhnaia thleng chauh ni loin, tun hma daih pawhin a lo thleng ṭhin niin a sawi bawk.

Ramchhunga insawisak rawn thleng ṭhin chungchanga Home Minister thusawi danah hian eptu lam an lungawi lo a, House aṭang hian an chhuak tau a ni.

Rajya Sabha-ah pawh hemi chungchang hi sawiho a nia, mahse insawisak rawn thleng zat chiah hi a chhinchhiah lo niin sorkar chuan a sawi. National Crime Records Bureau (NCRB) chuan bawng humhalh chhuanlama tharum thawhna thleng ṭhin zat chu a chhinchhiah lo a, mahse IndiaSpend database record aṭanga a landanin kum 2012 aṭang khan bawng humhalh kaihhnawihah tharum thawhna thleng hi ṭum 86 a tling.

Kum 2012 aṭang khan bawng kaihhnawiha tharum thawhna thlengah mi 33 in nunn an chan a, mipuiten an sawisak rawna hliam na tak tuar mi 188 awmin, hliam na vak lo tur 81 an awm bawk. Heng pawikhawihna thleng zinga a tam zawk hi kum li kalta, BJP-in centre-a thuneihna an chan hnua thleng a ni.

IndiaSpend data-a a lan danin, bawng kaihhnawiha tharum thawhna thleng zinga 47 hi BJP sorkarna state-a theng a ni a, Congress sorkarna state-ah ṭum 10 a thleng bawk.