Pawngsualtu thi tura hremna bill ngaihtuah dawn

Parliament Monsoon Session neih mekah hmeichhe naupang kum 12 hnuai lam pawngsualtu thi tura hremna pekna tur bill siam chu ngaihtuah a ni dawn.

Nilaini-a Prime Minister Narendra Modi-a kaihhruaia union cabinet meeting chuan pawngsualtu hremna na zawk pekna tur dan siam pharh hi an remti niin Law Minister Ravi Shankar Prasad chuan a sawi.

Jammu and Kashmir-a hmeichhe naupang pawngsual rawn leh thah a nih vang leh, Uttar Pradesh-a hmeichhe tleirawl pawngsual a nih vanga ramchhung hmun hrang hranga mipuiten lungawi lohna an lantir hnuah, pawngsualtu hremna na zawk pek theihna tur Criminal Law (Amendment) Ordinance chu April 21 khan siam a ni. Parliament-a pawngsualtu thi tura hrem a nih theihna tura dan siamthat, Criminal Law (Amendment) Bill, 2018 pass a nih hunah he dan hian Criminal Law (Amendment) Ordinance hi a thlak dawn a ni.

Prasad chuan Home Ministry in draft bill a buatsaih chu cabinet hian a pawmpui tawh niin a sawi.

Bill putluh turah hian hmeichhe naupang kum 12 hnuai lam pawngsualtute chu tihhlum theih an ni dawn a, kum 16 hnuai lam pawngsualtu hremna nep ber chu kum sarih chhung lungin tantir tih pawh kum 10-ah tihpun niin, damchhung tang tura pawhsei sak theih a ni bawk ang. Hmeichhia kum 16 hnuai lam pawngsualtute chu anticipatory bail pek theih an ni dawn lo bawk.