Thla 15 hnuah loneituten an nawrh an titawp dawn ta ; Delhi border-a nawrh huaihawtna hmun chhuahsan dawn

Ram chhunga loneitute pawl hrang hrangten sorkar laka an thil phutte tihlawhtling tura thla 15 chhung zet nawrh an huaihawt hnuah December 11 aṭangin nawrh an titawp dawn ta. Lungawi lohna lantira an punkhawmna, Delhi border-a an awmna hmun pawh an chhuahsan tawh dawn tih an sawi.

Loneituten an thil phut lian ber, farm law siam thar pathum chu sorkar laipuiin sut a remtih hnuah a sutna tur bill hi Parliament-ah pass a ni tawh. Hei bakah hian minimum support price (MSP) siamsak tur te, nawrh huaihawt chhunga loneitu mante chhuah leh thubuai siamsakte sut vek tura an phutna pawh sorkarin rem a tihsak avangin nimin khan nawrh tihtawp an tum thu hi an sawi ta a ni.

Nimin tlai dar 5.30 khan loneitu pawl hrang hrangte chuan Fateh Ardas (victory prayer) an neia, December 11 zing dar 9-ah an inkhuarna hmun, Delhi border-a Singhu leh Tikri-ah Fateh March (victory march) neiin an nawrh hi an titawp dawn a ni. Nimin tlai khan nikum November 26 aṭanga farm law duh lohna lantira an lo inkhuarna, Delhi border-a an puan in an kaihte pawh an sut ṭan a ni.

Loneitu pawl hrang hrang intelkhawm, Samyukta Kisan Morcha (SKM) sorkar laipuiin a thil tiamte chu a hlen em tih ennawn a, a hmalak dante ennawn turin nakkum January 15 hian Delhi-ah review meeting an nei dawn tih an sawi. Sorkar hian a thutiamte hi a hlen lo a nih chuan nawrh an chhunzawm leh tur thu an sawi bawk.

Sorkar laipui chuan SKM-in sorkar laipui dawr tura a din, member panga awmna committee hnenah November 21-a SKM-in an thil phut paruk an tarlanna an thehluh chhanna pein, an thil phutte hi remtihsak vek a nih thu ziakin a hrilh a ni. Sorkar laipui chuan Haryana, Uttar Pradesh leh Punjab sorkarte nawrh huaihawt chhunga an state mi loneitu thi chhungte hnenah zangnadawmna pek an remti tawh a, state dangte pawh ti ve turin ngen an ni tih a sawi.