Helicopter chetsual danah tri-service inquiry neih a ni dawn : Rajnath Singh

Parliament in hnih, Rajya Sabha leh Lok Sabha inkhawmah nimin khan Nilainia Tamil Nadu-a helicopter tlaa thi, Chief of Defence Staff Bipin Rawat leh a chuanpui mi 12-te sunna hun hman a ni.

Sunna hun hman zawhah defence minister Rajnath Singh chuan House pahnihah hian helicopter chetsual dan leh, a chuang zinga dam chhuak awmchhun Group Captai Varun Singh enkawl mek a nih thute a sawi.

Minister chuan helicopter chetsual dan hi uluk taka chhui a ni dawn a, tri-service inquiry nei turin Indian Air Force chuan thupek a tichhuak tawh tih sawiin, Air Officer Commanding-in-Chief Training Command Air Marshal Manvendra Singh-a'n a ho dawn a ni, a ti.

CDS General Rawat hi Nilaini khan Wellington-a Defence Services Staff College-a thu sawi tura a kal chu a chuanna, Indian Air Force Mi-17V5 helicopter chu chesualin a tla a, helicopter-a chuang mi 14 zinga 13 an thi a ni.

Rajnath Singh chuan, "Mi 17 V 5 helicopter hi Sulur Air Base aṭangin chhun dar 11:48-ah a thlawk chhuak a, Wellington-ah chhun dar 12:15-ah ṭum tura beisei a ni. Mahse chhun dar 12:08 khan Sulur Air Base-a Air Traffic Control chuan an bepawp thei ta lo a ni," tiin, Coonoor bula ram hnuaiah tualchhung miten helicopter tla hi an lo hmu tih a sawi.

General Rawat hi sipai chawimawina famkim nena vui a ni dawn tih Rajnath Singh chuan a sawi bawk. Nimin tlai khan General Rawat leh a nupui ruang hi sipai thlawhtheihna hmangin Delhi phurh thlen anni a, vawiin chawhnu dar 2-ah vui an ni ang.

Helicopter chesuala chuang zinga damchhuak awmchhun, Group Captain Varun Singh chu nimin khan Wellington-a Army hospital aṭangin Bengaluru-ah sawn a ni a, a dinhmun a la ṭha lo hle.