Kashmir rel kawnga lei dawhin India ram pawh vek dawn

Kashmir-a rel kawnga lei dawh kal tlangin Kashmir rel kawng chuan India ram a pawh vek tawh dawn tih Railway ministry chuan a tarlang. Lei dawh mek hi nakkum December aṭanga hman 

ṭan theih tura ruahman a ni. 

Kashmir-a lei dawh mek hi khawvela rel kawng sang ber a ni dawn a, metre 35 a sang a nih dawn bakah, 'Eiffel Tower' ai pawhin a sang zawk dawn a; China rama Beipan lui chunga lei dawh metre 275 a sang Shuibai railway bridge ai pawhin a sang zawk ang. 

"India ram history-a chuang tur a nih avangin a pui hle dawn a, Kashmir-a rel kawng leidawh hian India ram state hrang hrangte chu a pawh vek dawn a ni," tiin Konkan Railway Chairman Sanjay Gupta chuan a sawi. 

He rel kawng siam nan hian steel, tonne 5,462 hman tura ruahhman a ni a, heng steel-te hi Chenab lui aṭanga metre 359-a sanga remchhoh tur a ni. Leidawh mek thui zawng hi Km 1,315-a ni ang.

Jammu and Kashmir (J&K)-a Reasi district-a Bakkal leh Kauri khaw inkara dawh mek a ni. Kum 2002 khan sorkar laipui chuan he rel kawnga lei dawhna tur hi national project ni turin a lo puang tawh a, kum 2009 December khan zawh fel tum a nih hnuah, mipui tan a him loh an rin avangin hmalakna an titawp lailawk a; kum 2010 khan thar thawh leh a ni. Kum 2017 November thla khan dawh ṭan tak tak a ni a, nikum May khan zawh fel tum a ni a, mahse nimin khan railway ministry chuan nakkum December-a zawh fel a nih dawn thu an sawi leh ta zawk a ni.