Airline leh airport-ten Rs vbc 20,000 chuang hu hloh hman

Sorkar laipui chuan Covid-19 hripui leng vanga khuahkhirhna hrang hrang a siam vanga financial year 2020-2021 chhunga India rama airline leh airport-te sum hloh chu cheng vaibelchhe 20,000 chuang hu a ni tih a sawi.

Minister of State of Civil Aviation Gen. (Dr) V.K Singh (retd) chuan Lok Sabha inkhawma Bharatiya Janata Party (BJP) MP Poonamben Maadam zawhna a chhannaah a sawi a ni. Minister chuan Covid-19 hri leng hian India rama aviation sector-te a nghawng na hle a, kum 2020-21 chhungin airline-te hian Rs vbc 19,564 leh airport-ten Rs vbc 5,116 hu an hloh a ni, a ti.

Sorkar laipuiin ram pum huapa lockdown a puan avangin nikum March 25 khan ram chhunga thlawhtheihna service chu tihtawp a ni a, May thlaah 33% chin chuan phalsakin service an chhunzawm a, chuang thei zat khuahkhirhna hi nikum October khan thlahdul leh a ni.

Aviation sector tuai thar lehna tura sorkar hma lak tum dante sawiin, MoS chuan Airports Authority of India (AAI) chuan kum nga chhungin terminal thar siam leh awmsa siamṭhat, runway thuam ṭhat leh tihlen, Airport Navigation Services (ANS), control towers, technical blocks leh thil dang siamna atan Rs vbc 25,000 a hmang dawn tih a sawi. Domestic maintenance, repair and overhaul (MRO) service-a GST rate chu 18% aṭangin 5% ah tihhniam a nih thu a sawi bawk.