India ramah Covid-19 kai thar 8,503 awm belh ; March 2020 hnua hri kai mek tlem ber ṭum thleng leh

India ramah Ningani khan coronavirus kai thar 8,503 an awm belh leh a, rampumah Covid-19 kai mi 34,674,744 an awm tawh tih Union ministry of health and family welfare thuchhuak chuan a tarlang.

Covid-19 hri kai mek, active case chu mi 201-a pun belhin hri kai mek hi 94,943 an awm. "Hri kai tawh zat aṭanga hri kai mek hi 1% aiin a tlem zawk. 0.27% ni mekin, March 2020 hnua a hniam ber ṭum a ni" tiin ministry chuan a sawi.

Ningani vek khan Covid-19 kai dama puan mi 7,678 awmin, dama chhuahtir tawh zat hi 34,105,066 an ni. Covid-19 hri kai dam tawh, recovery rate chu 98.36% a nih thu Union health ministry chuan a sawi bawk a ni.

Covid-19 vanga thi 624 an awm belh leh a, an zinga 225 hi Kerala state ami an ni. Kerala hi coronavirus hri lengin a nghawng nat ber state a la ni chhunzawm zel a ni. Kerala state health department tarlan danin, thihpui mi 225 zinga 52 te chu Ningani a thi an ni a, a bak 173 te chu sorkar laipui leh supreme court te'n inkaihhruaina dan thar an tihchhuah hnua coronavirus vanga thi anga chhinchhiah ṭhat leh an nih thu a sawi. Kerala-ah hian hri kai 5,171,232 an awm tawh a, thihpui mi 42,239, hri kai mek 40,546 leh dama chhuahtir mi maktaduai 5.1 dawn an awm tawh.

Union health ministry chuan India ramah vaccine dose tluklehdingawn 1.31 an semchhuak tawh a, Ningani khan vaccine la thei puitling mi maktaduai 7.45 hnenah vaccine dose semchhuah leh a ni tih a sawi. Mi 809,809,983 te chuan dose khatna an la tawh a, 502,077,274 te chuan dose kimin an la tawh a ni.

India rama Omicron variant kai mek mi 23 zinga Rajasthan-a mi pakua te chu negative result an neih hnuah Ningani khan damdawi-in aṭangin chhuahtir an ni. Nimin thlenga sorkarina chhinchhiah dan chuan India ramah Omicron variant enkawl mek hi 14 an la awm.