Lok Sabha-ah No-confidence motion ngaihtuah

Nimina Lok Sabha inkhawmah eptu party ten BJP kaihhruai NDA sorkar rin tawk lohna motion an putluh chu ngaihtuah a ni.

Sorkar buk a nih hma, chawhma dar 11 aṭangin no-confidence debate neih hmasak a ni a, eptu party-te chuan sorkar an rin tawk lohna leh an sawiselna hrang hrangte an sawichhuak. Debate hi darkar sarih chhung neih hnua vote lak tura tih a ni a, mahse Speaker-in debate hi zan dar 7 thleng a pawtsei leh a ni.

Eptu party-te chuan House Speaker Sumitra Mahajan-i chu eptu lam thusawina hun pe tawi lutukah an puh. Eptu party lian ber Congress chu minute 32 hun pek niin, party dangte chu minute 25 leh 15 te hun pek an ni. Hetihlai hian rorellai BJP chu darkar thum hun pek a ni thung niin an sawi.

Congress president Rahul Gandhi chuan BJP leh Prime Minister Narendra Modi chu mipuite dawt hrilh ṭhinah a puh. Minute 20 chhung sorkar demna leh sawiselna hrang hrang a sawichhuah hnuah, Rahul Gandhi hian PM Modi-a ṭhutna lam panin a va kuah a, huatna a neih loh thu a hrilh zui. House chhunga MP-te chuan Rahul-a chetdan hi lawmin dawhkante an lo beng a, eptu member-te chuan standing ovation an pe bawk.

Rahul Gandhi chuan Rafael deal chungchangah defence minister Nirmala Sitharaman-i chu dawt sawiah a puh a, PM Modi leh a kaihhruai sorkar chu hnam tlem zawk leh mi retheite ngaihthahah a puh bawk.

House-a sorkar rin tawk lohna motion pulut tu, Andhra Pradesh-a rorellai Telugu Desam Party (TDP) chuan sorkar laipui chu an state tana special caterogy status a pek duh loh vangin an state thliar hrangah a puh. TDP aiawha thu sawitu, MP Jayadev Galla chuan sorkar laipui chu a thutiamte hlen zo lo sorkar nia sawiin, Andhra Pradesh tawrhna te ngaihthahah a puh. Prime Minister Modi chuan Andhra Pradesh-ah a campaign laiin an harsatnate chinfel sak a lo tiam tawh a, mahse a thutiamte chu a ngaihven zui lo a, Andhra state khawpui dinna tur aiin milim siamna turin sum tam zawk an pe chhuak a ni, a ti.

Biju Janata Dal hruaitu Bharturhari Mahtab pawhin sorkar hmasa UPA leh NDA sorkar chu Odisha mipuite chunga dik lo taka ro relah a puh a, sawihonaah pawh tel duhloin vote lak hmain BJD member-te hi house aṭangin an chhuak a ni. BJD hian Lok Sabha-ah member 19 a nei a, party zinga member ngah panga-na a ni pha a ni.

Sorkar rin tawk lohna motion ngaihtuaha vote laknaah hian central-a BJP thawhpui Shiv Sena chuan vote an thlak dawn lo tih an sawi. BJP president Amit Shah chuan Ningani khan Sena hotu Uddhav Thackeray chu telephone-a biain, sorkar lam thlawp tur hian a ngen. Mahse nimin khan Thackeray hian a ngaihdan hi thlakin, an party MP-te chu vote thlak hunah hai turin a hriattir a ni. Shiv Sena MP Anandrao Adsul chuan zinga meeting-ah party hotu thutlukna hi hriattir an nih thu sawiin, an party chuan party hotu lu ber thutlukna chu an zawm ṭhin tih a sawi. He thutlukna an siamna chhan chu sorkar laipui chuan ram inhmantir leh pawisa tih thih chungchangah thil tam tak a tihsual tawh vang niin a sawi a, hemi rual hian sorkar rin tawk lohna motion pu luttu Telegu Desam Party thiltihah chuan inrawlh an tum loh thu a sawi bawk.