WhatsApp-ah message forward theih zat bithliah dawn

Messaging app, WhatsApp hmanga thu dik tawk lo thehdarh vanga insawisakna thleng fo ṭhin venna kawng khat atan India rama WhatsApp hmangtu bik tan ṭum khatah chat/group panga aia tamah message forward theih loha siam tum a ni.

India ram bikah WhatsApp hmangtuten tan ṭum khatah message-te chat panga aia tama forward theih loha siam a nih dawn bakah, quick forward button pawh an tibo dawn niin company chuan a sawi.

Hemi chungchang hi WhatsApp chuan an blogspot-ah tarlangin, "Kum rei vaklo liamtaah khan ṭum khatah chat tam takah message forward theihna tur feature hi kan belh a ni. India ramah hian ram dang aiin message, thlalak leh video te forward hi a tam zawk a, hei hi ṭum khatah chat 5 chinah chauh forward theih turin kan enchhin dawn a ni", a ti. Hetianga an tih hian WhatsApp nihna, private messaging app a nihna pawh an vawnghim thei dawn niin a tarlang bawk.

WhatsApp kaltlanga thu dik tawk lo thehdarh anih ṭhin avangin ramchhunga mipui thinrimin mi an sawisak rawnna a thleng fo a, hei vang hian sorkar laipui chuan WhatsApp hnenah hian thu dik lo thehdarh ṭhin venna tura ruahmanna siam turin a lo ngen tawh a ni.