Loneitu tam zawkin Delhi border an chhuahsan tawh

Loneitute chuan farm law pathum duh lohna lantira kum khat chuang zet an awmna, Delhi border chu kar liam ta Inrinni khan an chhuahsan ṭan ta a, an zinga a tam zawk chuan an khaw lam an pan tawh a ni.

Delhi khawdai hmun pathum - Singhu, Ghazipur leh Tikri border-ahte hian nikum November 26 aṭang khan hmun hrang hrang aṭanga loneitu kalkhawmte chu inkhuarin, farm law duh lohna an lantir a ni. Mahse sorkar laipuiin Parliament-ah farm law pathum sutna tur bill pass a nih tak avang leh, loneitu pawl thil phut dangte pawh tihhlawhtlin vek a tiam tak vangin loneitute hian nawrh tihtawp hi an remti ta a ni.

Jai Kisan Andolan group vice president Deepak Lamba chuan, Inrinni khan Singhu border-a loneitu inkhuar zinga 80%, Ghazipur border aṭangin 50% leh Tikri border aṭangin 60-70% te chuan an in lam an pan nghal tih a sawi. Border area-a nawrh huaihawtna bula kawngpui kharte pawh December 15 aṭang chuan hawn leh theih vek an ni tawh ang.

Loneitu pawl hrang hrang intelkhawm Samyukta Kisan Morch (SKM) hruaitu Rakesh Tikait chuan Ghazipur border aṭanga an khaw lam pan tur, loneitute chuanna motor a vailiam a ni. Tikait chuan Delhi ramria an awmna hmun chu December 15-a a chhuahsan ve dawn tih a sawi.

SKM chuan nakkum January 15-ah review meeting an nei leh dawn a, hetah hian sorkarin a intiamnate a la tihhlawhtling lo a nih chuan nawrh an kalpui chhunzawm leh nghal dawn tih an sawi.