ICMR-in darkar 2-a Omicron variant hmuchhuak thei siam chhuak

Indian Council of Medical Research (ICMR) chuan darkar hnih chhung vel leka coronavirus hri thar, Omicron variant hmuchhuak thei, testing kit an siam chhuak tih report chuan a tarlang.

Dr Biswajyoti Borkakoty hona hnuaiah Regional Medical Research Centre (RMRC) for the Northeast region-a scientist-te chuan darkar hnih chhunga Omicron variant chhui chhuak thei testing kit hi an siamchhuak a ni.

"ICMR-RMRC, Dibrugarh chuan darkar hnih chhunga Omicron variant (B.1.1.529) SARS-CoV-2 (COVID-19) hmuchhuak thei tur, hydrolysis probe-based real-time RT-PCR hi an siamchhuak a ni," tiin Dr Borkakoty chuan kar liamta Inrinni khan a sawi. Omicron variant hmu chhuak tura whole genome-sequencing tihna atan ni 4-5 bakah, targeted sequencing tihna atan a tlem berah darkar 36 te hman anih laia hetiang khawl, hun reilote chhunga Omicron variant hmuh theihna tur siam ani chu a lawmawm hle tih Dr Borkakoty chuan a sawi.

Kolkata-a hmunpui nei GCC biotech company hian public-private partnership (PPP) model hmangin kit hi an siamchhuak tih ANI chuan a tarlang bawk.

Borkakoty kaihhruai scientist team hian nikum July thla khan SARS-CoV-2 virus hi hlawhtling takin an dah hrang thei a, hei vang hian ICMR-RMRC Dibrugarh chu ramchhunga sorkar laboratory zinga he dinhmun thleng thei pathumna a lo ni tawh a ni.

He kit hi ramchhunga Omicron hmunchhuahna state ṭhenkhatah siamchhuah a ni tawh nia sawi a ni. Delhi, Rajasthan, Maharashtra, Karnataka leh Gujarat-ah variant thar hi an hmuchhuak tawh a, nimin tlai thleng khan ramchhungah nimin tlai thleng khan Omicron kai mi 37 an awm tawh a ni.