Republic Day-ah Central Asia ram 5-te khuallianah sawm

Sorkar laipui chuan nakkum January 26-a Republic Day lawmna neih tura Central Asia ram panga- Kazakhstan, Kyrgyzstan, Tajikistan, Turkmenistan leh Uzbekistan te chu khuallian atan a sawm.

Hei hi a ruala Central Asia ram pangate khuallian an ṭan vawi khatna tur a ni a, Republic Day lawmnaa khuallian atana ram pakhat aia tam sawm an nih ṭum hnihna a ni bawk. Kum 2018 Republic Day lawmnaah khan ASEAN ramte chu khuallian atan sawm an lo ni tawh a ni.

Kar hnih vel liamta aṭang khan hemi chungchangah hian inbiakna an lo nei tawh a ni. Hei hi sorkar laipuiin Central Asia ramte inzawmna a neih tihnghehna tura a hmalakna nia ngaih a ni. Prime minister Narendra Modi chuan Central Asia ramte hi kum 2015 kha a lo tlawh kim vek a, India prime minister zingah tlawh kim hmasa ber a ni bawk.

December 18-19 hian New Delhi-ah Central Asia leh India foreign minister-te chuan meeting an nei dawn a, hei hi meeting an neih ṭum thumna tur a ni. A ṭum khatna atan kum 2019 January thla khan Uzbekistan-a Samarkand-ah meeting hi an lo nei tawh a, hemi ṭum hian India aiawhin hetih laia external affairs minister Sushma Swaraj a tel a ni. Nikum khan hripui leng vangin meeting hi virtual hmanga neih a nih thung.

Kum 2014-a prime minister Narendra Modi-a'n thuneihna a chan aṭang khan Republic Day lawmnaa khuallian tur hian US President Barack Obama (2015), France President Francois Hollande(2016), UAE hruaitu Md Bin Zayed Al Nahyan (2017), ASEAN ram 10 (2018), South Africa President Cyril Ramaphosa (2019) leh Brazil President Jair Bolsonaro (2020)-te sawm an ni tawh. Kuminah khan UK Prime Minister Boris Johnson chu rawn kal tura beisei a ni a, mahse Covid hri leng avangin a rawn kal thei ta lo a ni.