'Opposition meet' ah Mamata Banerjee a tel dawn lo CAA leh NRC dodal chhunzawm zel a tum

West Bengal chief minister Mamata Banerjee chuan Congress hruaitu Sonia Gandhi-in January 13-a Opposition Meet a kohah chuan a tel dawn lo tih a sawi. 

January 13 hian eptu party hrang hrang hruaitute chuan Citizenship (Amendment) Act (CAA) dodalna lantir mek leh, university campus hrang hranga tharum thawhna thleng chungchang sawiho turin inhmuhkhawm an tum a ni. 

Mamata Banerjee chuan CPM leh Congress party chu Bengal-a politics bawlh­hlawh tak khelah puhin hei vang hian eptu pawl hruaitute inhmuhkhawm turah pawh a tel dawn lo tih a sawi. Hemi rual hian midangte thurualpui kher loin, CAA leh National Register of Citizens (NRC) chu theihtawpin a dodal chhunzawm zel dawn tih a sawi. 

Left leh Congres party-ten sorkar laipui economic policy duh lohna lantira rampuma bandh an huaihawt vangin Banerjee hian he thutlukna hi a siam nia ngaih a ni. Bengal CM chuan, "West Bengal-ah chuan nawrh huaihawt hi kan phal lo. Nawrh huaihawt hmangin state economy tihchhiat an tum zawk a ni," a ti.