Right-wing group-te'n Kristiante bei; an sakhaw lehkhabu halsak

Karnataka-a right-wing group-te chuan sakhaw inleh luih tira puhin Kristian mi pali an bei a, an sakhaw lehkhabu an halsak.

He thil hi kar liam ta Inrinnia Kolar district-a Srinivasapura-a thleng niin, Karnataka Assembly Winter Session-a sakhaw danga inleh khapna, anti-conversion Bill an pharh hma nia thleng a ni.

Police-te chuan right-wing group member-te hian Kristian sakhaw vuantu mi palite'n Srinivasapura hmuna an sakhaw lehkhabu sem tura an in puahchah laiin an bei nia sawi a ni. An sakhaw lehkhabu ken chu chhuhsakin an halsak bawk. Police-te chuan thubuai thehlut an la awm loh thu an sawi.

Police-te chuan he thil thlen hnu hian beih tawk Kristian palite nen inhmuin, thil thlen dan an sawiho tih an sawi. Kristiante hian sakhaw danga midangte inlehtir tumna an neih loh thu leh, sakhaw lehkhabu sem dan tur chungchang sawihoa kalhawm an nih thu an sawi. Anmahni beitu, right-wing member-te lakah erawh thubuai thehlut an la awm lo a ni.

Karnataka chief minister Basavaraj Bommai chuan Pathianni khan "Mipui ṭhahnem takin sakhaw danga inleh khapna siam an duh. Law department chuan draft bill an ennawn mek a, an zawh hunah cabinet meeting-ah tihfel a ni ang," tiin a sawi.

Hetih lai hian eptu party, Congress chuan Assembly Winter Session chhungin anti-conversion Bill chu dodal an tum thu sawiin, he dan hi Kristian sakhaw kalh zawnga siam an nih thu an sawi. Karnataka Pradesh Congress Committee president D K Shivakumar chuan "Sorkarin bill hi pharh mah se kan dodal zel dawn a ni," a ti.

Assembly session neihna tur, Belagavi-ah kar liamta Inrinni tlai khan mipa pakhat chem keng chu Kristiante biak-inah tlan lutin,puithiam lo awm chu chem nen a um a ni. Police-te chuan thubuai ziahluh a nih thu leh, biak-in pawh police-te ven tir a nih thu an sawi. Mahse chem nena biak-in luhkhungtu hi tun thlengin man a la ni lo.