Parliament beih champha kum 20-naah PM leh President-ten nunna chante zahna hlan

Prime minister Narendra Modi, president Ram Nath Kovind leh union minister-te chuan nimin khan kum 2001-a parliament beih champhaah, he pawikhawihna thlenga nunna chan security force-te zahna an hlan.

Prime minister Narendra Modi chuan kum 2001-a Parliament beih a nih ṭuma ram tana nunna hlantu, security force-te zahna a hlan thu sawiin, ram tana an inpekna hi tun thlenga ram mipuite rilru hnehtu a la ni reng a ni, a ti.

President Ram Nath Kovin pawhin firfiakte laka Parliament venhimna tura beia an nunna hlantu, sipai huaisente inpekna chu ram mipuiten an theihnghilh ngai dawn lo a, an chungah an lawm reng dawn a ni, tiin a sawi bawk.

December 13, 2001 khan firfiakte chuan Parliament hi an bei a, Rajya Sabha-a Parliament Security Service mi pahnih, Delhi Police panga leh Central Reserve Police Force (CRPF)-a hmeichhe constable pakhatte chuan Parliament House Building-a firfiak luh tumte an dannaah an nunna anchan a ni. An ni rual hian CPWD huan enkawltu pakhat pawh inbeihnaah hian a thi bawk a ni.

Firfiak pangate hi sipaite chuan an that vek a ni. He inbeihna avang hian India leh Pakistan inkarah inhmuh thiam lohna a len phah hle a, Parliament venhimna pawh nasa taka thuamṭhat a ni.