Thla 6 hnuah naupang tan Covid vaccine semchhuak thei dawn

Serum Institute of India (SII) chuan thla ruk hnuah ramchhunga naupangte tan Novavax Covid-19 vaccine an semchhuak ṭan dawn tih SII CEO Adar Poonawalla chuan a sawi.

Confederation of Indian Industry-in virtual conference an buatsaiha thu a sawiah, Poonawalla chuan Novavax, Cocovax tia sawi bawk hi naupang kum thum chin chunglam tana an enchhinnaah result ṭha tak an neih thu a sawi a ni.

Novavax vaccine hi Indonesia ramah pawh thawnchhuah niin, SII hian AstraZeneca leh Sputnik vaccine te pawh an siamchhuak tel bawk.

SII hian April thla aṭang khan thlatin AstraZeneca vaccine hi a let li dawnin an siamchhuak hnem tawh a, dose maktaduai 250 siamchhuak mekin demand a tlakhniam tawh avangin an vaccine siamchhuah hi a zahve vela tihtlem tumin ruahmanna an siam leh tawh a ni.

Poonawalla chuan khawvel huapa vaccine an semchhuah mek chu infrastructure lama indaihlohna lian tak an tawh avangin vaccine an duhkhawp pe thei mah se ramdangin an ram mipuite duhkhawp an pekchhuah theih loh phah tih a sawi.

"Ram tam tak, India pawh huamin, demand aiin supply a tam zawk a ni," tiin "Hetihlai hian ram ṭhenkhatte chuan an ram mipui zinga 10% emaw 15% emaw bak dose kimin an la pe thei lo a, 60%-70% tal an pek a ngai a ni," a ti.

Nakkumah Covid vaccine dose tld 5 siam dawn : Piyush Goyal
India chuan Covid vaccine tam zawk siamchhuah tumin nakkum lamah chuan vaccine dose tluklehdingawn nga siamchhuah theih an tum tih commerce minister Piyush Goyal chuan Thawhṭanni khan a sawi. Confederation of Indian Industries (CII) neihnaa a thusawiah Goyal chuan India hian ṭhenawm ramte mamawh zat ang siamchhuak turin an inpeih thu a sawi.

"Kumin hian dose tluklehdingawn 1.33 kan semchhuak tawh a ni. Ramdanga thawnchhuah turin kan siamchhuak bawk. Ramdangin an mamawh zat ang zelin kan thawnchhuak dawn a ni. Nakkum hian dose tluklehdingawn nga pekchhuah leh kan tum a ni," a ti.