Opposition Leader-te'n MP-te hremna sut phutin kawng an zawh

Rajya Sabha-a eptu MP 12-te hremna sut tura phutin nimin khan eptu party hrang hrangte chuan Opposition party hrang hrang hruaitute chuan Parliament aṭanga Vijay Chowk thlengin kawng an zawh.

Party hrang hrang hruaitute hi Rajya Sabha-a Leader of Opposition Mallikarjun Kharge-a chamber-ah inhmukhawmin, nasa zawka lungawi lohna lantir an rel a ni.

Nimina MP-te hremna sut tura phuta kawngzawhnaah hian Congress hruaitu Rahul Gandhi pawh a tel. Rahul Gandhi chuan, Rajya Sabha MP 12-te hrem an nih dan chu India ram mipuite aw chhuah tur rahbehna lantirna a ni tiin, Parliament-ah chuan ram tana thil pawimawh chu eptu member-ten an auchhuahpui phalsak an ni lo tih a sawi bawk.

August thlaa Parliament session neihah an chet dan mawi lo avangin, November 29-a Parliament Winter session neih ṭan ni khan Rajya Sabha-a eptu MP 12-te chu session neih chhung tel thei lo turin hrem an ni. Hei hi eptu lamte hian an sawisel nasa hle a, MP-te hremna pek hi sut leh phutin House chhungah rorel hlei thei loin an aubuai fo a ni. Nimina Rajya Sabha rorel inkhawm pawh eptu pawlte aubuai avangin chawhnu dar 2 thleng inkhawm tihtawp a ngaih phah leh a ni.