PM-in sorkar rin tawk lohna motion pulut-tu TDS sawisel

Kar kalta Zirtawpni khan Lok Sabha-ah centre-a BJP kaihhruai National Demcoratic Alliance (NDA) sorkar rin tawk lohna motion putluh a ni a, sorkar laipui chuan vote laknaah hneh takin fiahna hi a paltlang a ni.

Vote lak hmain House-a no-confidence debate neih hmasak a ni a, eptu party aiawh hrang hrangten sorkar lakah an lungawi lohna te, sorkar dik lohna nia an hriatte an sawichhuak a, eptu aiawhten an sawi zawha rorellai BJP lamin thu an sawi ve leh a ni. Debate hi zan dar 6 thleng neih tura ruahman ni mah se, Speaker chuan hun hi pawtseiin zan rei hnuah vote an la thei chauh a ni. Debate-ah hian eptu party-te chu minute 30 aia rei lo vek hun pek niin, partyṭhenkhat chu minute 15 leh minute 9 chauh pek a ni a, hetihlai hian BJP chu darkar thum leh minute 33 zet hun pek a nih vangin eptu lam an lungawi lo hle.

Debate zawh hnuah vote lak niin, sorkar thlawp lamah MP 325 ten an vote a, sorkar rin tawk lohna motion thlawp lamah MP 126 ten an vote thung. House-a fiahna paltlang tur hian vote 226 hmu phak a ngai a, BJP lam hian awlsam takin he fiahna hi an paltlang a ni.

Lok Sabha-ah hian BJP hian party mal pawhin majority a nei pha a, hetichunga sorkar rin tawk lohna puluttu Andhra Pradesh-a rorellai Telugu Desam Party (TDP) leh Andhra Pradesh Chief Minister Chandrababu Naidu chu PM Modi chuan na takin a sawisel. PM chuan TDP te chu politics thila hamṭhatna an duh vang chauhah motion hi pulutah a puh.