Huatna ni loin hmangaihna hmangin hnehna kan chang ang: Congress

Congress party chuan kar kalta Zirtawpni-a Lok Sabha-a sorkar rin tawk lohna motion ngaihtuah a nih ṭuma party president Rahul Gandhi-a'n a thusawi zawhah Prime Minister Narendra Modi a kuah lai poster chu Mumbai khawpuiah tarin, an party chuan huatna niloin, hmangaihna hmangin hnehna an chang dawn tih an sawi.

Congress president-in House-a PM a kuah lai video leh thlalak hi internet lamah a darh nasa hle.

Rahul Gandhi hian no-confidence debate an neihah Prime Minister Modi, Bharatiya Janata Party (BJP), leh Rashtriya Swayamsevak Sangh (RSS) te na takin a bei a, mahse a thusawi zawhah Treasury bench lamah kalin PM hi a va kuah a, hemi hnu hian a ṭhutna lamah a let leh nghal a ni.

Congress president hian BJP-in 'Pappu' tia an sawi chungchang te a sawichhuak a, BJP tan chuan 'Pappu' ni mah se, politics-a an khingpuite chu mimala huatna a neih loh thu a sawi. Indian nihna dik tak chu midangin eng ang pawhin sawisel nasa mah se hmangaih let theihna chu a ni, a ti. PM, BJP leh RSS te chuan Hindu leh Hindustani nihna dik tak an hriattir theih avangin a lawm hle tih a sawi bawk.