CWC-ah Sonia Gandhi-i'n sorkar laipui bei

Congress president Rahul Gandhi-a'n Congress Working Committee (CWC) a tihlen hnua meeting hmasa ber chu Pathianni khan neih a ni a, he meeting-ah hian party president hlui Sonia Gandhi chuan thu sawiin, Prime Minister Narendra Modi-a kaihhruai sorkar chu sorkar hlauhawm tak a nih thu a sawi.

Sonia Gandhi chuan BJP kaihhruai NDA sorkar hnuaiah democracy chu nekchepin a awm mek niin a sawi. UPA chairperson chuan midang nena thawhhona chu tihhlawhtlin zel an tum tih sawiin, Rahul Gandhi an thlawp zel tur thu a sawi. BJP hnuaiah democracy nek chepin a awm mek a, he sorkar hlauhawm tak lak aṭang hian ram mipuite chu chhanchhuah an ngai a ni, a ti.

Prime Minister hlui Manmohan Singh pawhin thu a sawi a, India ram khawtlang dinhmun leh economy lama hmasawnna chu din thar leh a ngai a ni tiin, an party chuan Rahul Gandhi hmalakna chu an thlawp zel tur thu a sawi bawk.

Rahul Gandhi hian kar hmasa khan Congress Working Committee member thar tur ruat tharin a tilian a, member 23 bakah permanent invitee 19 leh special invitee pakua an awm. He committee din tharah hian senior leader zingah Digvijaya Singh, Janardan Dwivedi, Kamal Nath, Sushilkumar Shinde leh Karan Singh te chu thlak an ni.