Africa ram pathum tlawh turin PM Modi a zin

Prime Minister Narendra Modi-a chu Africa ram pathum tlawh turin nimin khan a zin.

PM Modi hian nimin han Rwana a pan a, vawiin tlai lamah Uganda panin July 25 thleng a cham ang. July 25-27 ah South Africa a tlawh leh dawn a, a cham chhung hian Brics Summit-ah a tel nghal dawn a ni.

Foreign Ministry chuan secretary (economic relations) TS Tirumurthi chuan India chuan Africa ramte chu inzawmna ṭha tak a neihpui a, India tan pawh an pawimawh hle tih a sawi. Kum 2015 October thlaa 3rd India-Africa Forum Summit neihah khan Africa ram 40 chuang hotu an lo tel a, kumin March thlaa New Delhi-a International Solar Alliance Founding Conference-ah khan hruaitu tam tak an rawn tel bawk a ni, a ti.

Modi hi India Prime Minister zinga Rwanda ram tlawh hmasa ber tur a ni. Rwanda President Paul Kagame chuan a lawmna inkhawm a lo buatsaih dawn a ni. A cham chhung hian ram hruaitute a kawm bakah, Kigali Genocide Memorial a tlawh bawk ang. Hei bakah hian Rweru model village a tlawh dawn bawk a, he khua atan hian India chuan Girinka scheme kalpuina turin bawng 200 a pe dawn a ni.