Maha-ah BJP-in party mala chuh tum

Bharatiya Janata Party (BJP) chuan kum 2019-a inthlanpui neihah Maharashtra-ah chuan party dang thawhpui loin an party mala an chuh tur thu party president Amit Shah chuan a sawi.

Maharashtra-ah hian BJP hi Shiv Sena nen an thawkdun a, mahse kar kalta Zirtawpni-a Lok Sabha-a BJP kaihhruai NDA sorkar rin tawk lohna motion putluh a, vote lak a nih khan Shiv Sena chuan a boycott a ni. Hemi hnu hian Shah chuan an party hruaitu hlunte chu meeting neihpuiin, 2019 Lok Sabha inthlanpui neih tur chungchang te, Maharashtra-a an party thuam chak dan turte an ngaihtuah a ni.

Shiv Sena hian Lok Sabha-a sorkar fiahna neih hi an boycott bakah, Congress president Rahul Gandhi-an sorkar laipui beihna thu a sawite chu an party chanchinbu Saamana-ah an fak zui bawk.

BJP president Shah chuan Maharashtra-a an party mi leh sate chu nakkuma inthlanpui neih tura party mala chuh tura inbuatsaih turin a ti a, party thuam chakna tura hmalakna tur hrang hrangte a tarlang bawk. BJP chuan Maharashtra-a Lok Sabha seat 48-a an candidate tur pawh an puang thuai dawn niin a sawi.

Kum 2014 Lok Sabha inthlanpuiah khan Maharashtra-a seat 48 awmah BJP hian seat 23 lain, Shiv Sena-in seat 18, NCP-in seat li, Congress in seat hnih leh Swabhimani Paksh in seat khat an la a ni.