Rajasthan police-ten mihring hliam tuar aiin bawng ngaihsak zawk

Rajasthan-a Alwar khuaah kar kalta Zirtawpni zan khan mi pakhat chu bawng tawlhrua puhin mipui thinrimin an sawisa a, a hnuah a hliam tuar loin a thi. A thih chhan hi police-ten amah aia bawng an ngaihsak hmasak vang zawk nia sawi a ni.

Police-te chuan mipuite kut tuartu, kum 28 mi Akbar Khan hi hliam na tak tuara an hmuh hnuah damdawi-in lam an panpui mai a lo a, a bawng phurhte chu km 10-a hlaa bawng enkawlna hmunah an dah hmasa phawt a, hemi hnu hian damdawi-in lam an panpui chauh nia sawi a ni. Akbar Khan hi rang taka damdawi-in panpui ni se chuan a nunna hi chhan hman a ni thei dawn niin media report chuan an tarlang.

Rajasthan Home Minister Gulab Chand Kataria chuan media report aṭangin police-ten Khan-a hliam tuar hi damdawi-in an panpui mai lo tia an sawi chu a ngaihven zui thu sawiin, thil awmdan dik tak hriat tuma an buaipui mek thu leh, hei hi thu dik a nih chuan mawhphurtute chungah action lak ngei a nih tur thu a sawi.

All India Majlis-e-Ittehad-ul Muslimeen (AIMIM) chief Asaduddin Owaisi chuan kum 2017-a Alwar-ah vek mipui thinrimin Pehlu Khan an sawisak hlum ṭuma thil thleng nen a in ang nia sawiin, Rajasthan police-te thiltih dan chu an tan thil thar a nih loh thu a sawi bawk. Police-te chuan bawng humhalhtu intite chu an thlawp tlat a, bawng humhalh chhuanlama pawikhawina an thlenah pawh an ṭangrual zel a ni, a ti.

Congress president Rahul Gandhi pawhin Rajasthan police-te thiltih dan hi a dem thu a sawichhuak a, km 6 chauha hlaa awm hospital panpui nana police-ten darkar thum zet hun an hmang leh, kawng lakah thingpui ina an chawl te chu a dem thu sawiin, hei hi PM Modi-an 'New India' tia a sawi, mihringte inlainat tawnna chu inhuatna leh inrahbehna, thi tura inkalsan mai pawi tih lohnain a thlakna chu a ni, a ti.