'Study in India' scheme hnuaiah Syria zirlai 500 ten lehkha zir dawn

Sorkar laipuiin kumin April thlaa a tlangzarh, 'Study in India' scheme hnuaiah tualchhung indo thlenna ram, Syria-a zirlai 500 dawn chuan India rama sorkar leh private institution hrang hrangah lehkha an zir dawn.

'Study in India' scheme hian south Asia, southeast Asia, Middle East leh Africa rama zirlaite India ram institution ṭhaa an zir theihna tura hip luh a tum a ni. Human Resource Development (HRD) ministry official chuan he scheme hi kumina tlangzarh chauh ni mah se zirlai diltu tam tak an hmuh tawh thu a sawi. A bikin Syria aṭangin zirlai diltu an ngah hle niin a sawi.

All India Survey on Higher Education (2016-17)-ah chuan India rama zirna in hrang hrangah Syria aṭanga zirlai kal 94 an awm a, Nepal aṭangin zirlai 2,275, Ethiopia aṭangin 751 leh Bangladesh aṭangin zirlai 635 an awm a ni.

He scheme hnuaiah hian ram dang zirlaite tan seat 20,000 dah a ni a, official-te chuan seat dah zat hi 2019-20 academic session-ah 22,00 a tihpun a ni dawn a, fee hi 55% a tihniam a ni dawn thung niin an sawi.