Hri leng thar lakah vaccine te'n hna thawk thei lo maithei : VK Paul
Omicron variant hri leng thar vanga hlauhthawnna lian zel karah India rama Covid Task Force hotu VK Paul chuan, "Kan vaccine neih mekte hian buaina kan tawh thar lakah hna an thawk thei lo maithei," tiin a ṭul ang zela vaccine siam danglam tura inpeih reng a ngai tih Thawhlehni khan a sawi. Paul chuan India rama Covid leng mek chuan tlakhniam lam panin, hri inkaichhawng pawhin hniam lam a pan zel a beisei thu a sawi nghal bawk.
"Delta hlauhawm zia kan hre tawh a, tunah Omicron-in min nuai leh mek a ni. Omicron nena kar thum kan inchenchilh hnu hian kan vaccine hman mekte hian an chakna an hloh ṭan nia a lanna pawh a awm. Vaccine chungah rinhlelhna tam tak rawn chhuakin, a tawpah eng nge kan thlen dawn hriatthiam a harsa rih hle a ni" a ti.
Paul chuan hri inthlak danglam zel do hneh theih tur vaccine ṭha tawk tak mamawh a nih thu a sawi bawk.
2022 Jan-Feb inkarah Omicron kai an pun chhoh a rinawm
India ramah nakkum January - February thla inkar hian Omicron kai an pun chhoh a rinawm thu leh, hri inkaichhawn awl tak Delta variant ai pawhin Omicron inkaichhawng hi an tam zawk an ring tih senior official chuan a sawi. Mahse hri kai te hian an taksa lamah erawh harsatna lian tham an tawh a rinawm loh thu a sawi nghal bawk.
Official sawidanin, zirchianna an kalpui hnuah hri kai hi pung chho mah se hri hian harsatna lian tak a thlen tawh dawn loh avangin mipuite chu chiai lutuk lo turin a ngen a ni. Mipuite chu thlabar lo tura chahin, Omicron inkaichhawng tur danchah tuma hmalak a ngaih thu an sawi.
Health official-te chuan tun aṭanga thla rei lote hnuah Omicron kai hi an pung chho dawn a, Delta variant pawh a luahlan mai dawn niin an sawi a, mahse hri kai te hian damdawi-in panpui ngai khawpa an awm a rinawm lo tih an sawi a ni. Healthcare system lam pawh a tihbuai lutuk loh a beisei awm tih an sawi a ni.
"Mipuiten he hri an lak nat lutuk loh leh, thihna hial thlen phahna turte dan tumin mipui tam zawkin vaccine dose kima an lak theihna turin theihtawp kan chhuah a ni. Ram dang data-te kan thlirin, Omicron kaite hian an la na lutuk lo a ni. Tunah hian high risk-te pawh vaccine hmangin kan la ven theih hun lai a ni a, hlauhthawn chiamna tur a awm hrih lo," tiin an sawi.
Sorkar laipui chuan state-te chu hri inkaichhawn titlem tura inkhuahkhirhna kalpui tur leh mipui tam zawkten vaccine dose hnihna an lak theihnan vaccine semchhuah lamah pawh ṭan la turin a lo chah tawh bawk.